काठमाडौं । अमेरिकाको हवाई टापुमा पर्ने माउई काउन्टीको एक जंगलमा आगलागी भएको छ । आगलागीमा परी अहिलेसम्म ५३ जनाको मृत्यु भएको बीबीसीले जनाएको छ ।
आगलागीमा परी ऐतिहासिक सहर लहेना नराम्ररी प्रभावित भएको छ । स्थानीय अधिकारीहरूलाई उद्धृत गर्दै समाचार संस्थाहरूले आगलागीमा परी कम्तिमा एक हजार मानिस अझै बेपत्ता रहेको उल्लेख गरेका छन् ।
हवाई गभर्नर जोस ग्रीनले आफ्नो फेसबुक पेजमा आगलागीको भिडियो शेयर गरेका छन् । उक्त भिडियो फुटेजमा आगलागीबाट शहर भग्नावशेषमा परिणत भएको देख्न सकिन्छ ।
आगलागीपछि हजारौं पर्यटक र स्थानीय मानिसहरूलाई अस्थायी आश्रयमा सारिएको छ ।
=========================================================
काठमाडौं । संयुक्त राज्य अमेरिकाको हवाई राज्यको माउ टापुमा भएको भिषण आगलागीमा कम्तीमा ३६ जनाको मृत्यु भएको बताइएको छ । भिषण आगलागी जारी रहँदा राज्यले आपतकालीन अवस्था घोषणा गरेको छ ।
हावाले डढेलो फैलाउन इन्धनजस्तो काम गरिरहेको बताइएको छ । डढेलो लागेको क्षेत्रबाट अधिकारीहरूले ११ हजार मानिसहरुलाई स्थानान्तरण गरेको बताएका छन् ।
टापुको लाहाइना क्षेत्र सम्भवतः सबैभन्दा बढी प्रभावित क्षेत्र भएको र त्यहाँ अधिकारीहरूले आगो नियन्त्रण गर्न संघर्ष गरिरहेको बताइएको छ ।
आगलागीबाट २७१ भन्दा बढी संरचना क्षतिग्रस्त र ध्वस्त भएको बताइएको छ । हवाईकी कार्यवाहक गभर्नर सिल्भिया लुकले आगलागीबाट रिकभर हुन लामो समय लाग्ने बताएकी छन् ।
आगो निभाउन सैन्य प्रतिक्रियाको नेतृत्व गरिरहेका मेजर जनरल केनेथ हाराले अग्नि नियन्त्रकहरूले हालसम्म एक लाख ५० हजार ग्यालन भन्दा बढी पानी प्रयोग गरिसकेको बताएका छन् ।
यो घटनालाई गभर्नर ग्रीनले ‘असाधारण’ र ‘दुःखद’ भनेका छन् । उनले यस आगलागीबाट १ हजारभन्दा बढी भवन जलेर नष्ट हुने अनुमान गरेका छन् ।
उनले आगलागीलाई राज्यको इतिहासकै सबैभन्दा ठूलो विपद् भनेका छन् । उनले आगलागीमा परी मृत्यु हुनेको सङ्ख्या बढ्न सक्ने बताएका छन् ।
अमेरिकी अन्तरिक्ष एजेन्सी नासाले आगोको परिमाण देखाउने तस्बिर सार्वजनिक गरेको छ भने अमेरिकी राष्ट्रपति जो बाइडेनले हवाईको जंगलमा लागेको आगलागीलाई ठूलो प्रकोप घोषणाको संज्ञा दिएका छन् ।
आगो निभाउन हेलिकप्टर प्रयोग गरिएको तर १३६ किलोमिटर प्रतिघण्टाको वेगमा हावा चलिरहँदा उद्धार कार्य चूनौतीपूर्ण रहेको उनले बताएका छन् ।
