काठमाडौं । माछापुच्छ्रे बैंक लिमिटेडले चालू आर्थिक वर्ष २०८२/८३ को दोस्रो त्रैमासिक वित्तीय विवरण सार्वजनिक गरेको छ। विवरणअनुसार गत आर्थिक वर्षको पुस मसान्तको तुलनामा चालू आवको सोही अवधिमा बैंकको खुद नाफा र प्रतिशेयर आम्दानीमा वृद्धि भएको छ।
गत आवको पुस मसान्तसम्म ८० करोड ७३ लाख २७ हजार रुपैयाँ खुद नाफा कमाएको बैंकले चालू आवमा २५.२५ प्रतिशतको वृद्धिसँगै १ अर्ब १ करोड ११ लाख ७३ हजार रुपैयाँ खुद नाफा कमाएको जनाएको छ।
बैंकको खुद ब्याज आम्दानी पनि गत आवको दोस्रो त्रैमाससम्म २ अर्ब ८२ करोड ३६ लाख ७० हजार रुपैयाँ रहेकोमा चालू आवमा ४.१६ प्रतिशतले वृद्धि भई २ अर्ब ९४ करोड १० लाख १६ हजार रुपैयाँ पुगेको छ।
समीक्षा अवधिमा बैंकको कुल सञ्चालन आम्दानी ३ अर्ब ६९ करोड ९९ लाख ४१ हजार रुपैयाँबाट बढेर ४ अर्ब २ करोड ६९ लाख ९१ हजार रुपैयाँ पुगेको छ भने सञ्चालन नाफा भने १ अर्ब ६२ करोड २७ लाख ९७ हजार रुपैयाँबाट घटेर १ अर्ब ४५ करोड ६८ लाख ९१ हजार रुपैयाँमा झरेको छ।
यद्यपि बैंकको प्रतिशेयर आम्दानी (ईपीएस) १३.३६ रुपैयाँबाट बढेर १६.७३ रुपैयाँ पुगेको छ। बैंकको खराब कर्जा (एनपीएल) ४.५४ प्रतिशतबाट घटेर ४.२५ प्रतिशतमा झरेको छ भने प्रतिशेयर नेटवर्थ १६१.६ रुपैयाँ कायम रहेको छ।
चुक्ता पूँजी १२ अर्ब ८ करोड ६२ लाख रुपैयाँ रहेको बैंकको शेयर प्रिमियम ३ करोड ८ लाख रुपैयाँ, जगेडा कोषमा ४३ करोड ६३ लाख रुपैयाँ र रिजर्भ कोषमा ६ अर्ब ९८ करोड १८ लाख रुपैयाँ सञ्चित रहेको छ। बैंकले १ खर्ब ५४ अर्ब ९५ लाख रुपैयाँ कर्जा प्रवाह गरी २ खर्ब ४ अर्ब ४ करोड ७१ लाख रुपैयाँ निक्षेप संकलन गरेको जनाएको छ।
