काठमाडौं । सानिमा बैंक लिमिटेडका नव नियुक्त प्रमुख कार्यकारी अधिकृत (सीईओ) पवन कुमार आचार्यले औपचारिक रूपमा पदभार ग्रहण गरेका छन्। बैंकको सञ्चालक समितिको गत कात्तिक २४ गते बसेको बैठकको निर्णयअनुसार आचार्यलाई सीईओमा नियुक्त गरिएको हो।
आचार्यले संयुक्त राज्य अमेरिकाको पिट्सबर्ग स्टेट युनिभर्सिटीबाट स्नातकोत्तर र भारतको एमएनआईटी, जयपुरबाट इन्जिनियरिङ्गमा स्नातक डिग्री हासिल गरेका छन्। शैक्षिक उपलब्धिहरूमध्ये उनले एसएलसी परीक्षा आदर्श विद्या मन्दिर हाई स्कूलबाट बोर्ड तेस्रो श्रेणीमा उत्तीर्ण गरेका थिए।
बैंकिङ्ग क्षेत्रबाहेक इन्जिनियरको रूपमा चार वर्षभन्दा बढीको व्यावसायिक अनुभव रहेका आचार्यले पाँच वर्षसम्म भिजिटिङ फ्याकल्टीका रूपमा पनि सेवा दिएका छन्।
उनको प्रमुख कार्य क्षेत्रहरूमा कर्जा मूल्याङ्कन, डिजिटलाइजेसन तथा परियोजना वित्त रहेका छन्। उनले सानिमा बैंकको सहायक कम्पनी सानिमा क्यापिटल लिमिटेडमा अध्यक्षका रूपमा पनि सेवा प्रदान गरिसकेका छन्।
२१ वर्षदेखि सानिमा बैंकमा योगदान पुर्याउँदै आएका आचार्य यसअघि वरिष्ठ नायव प्रमुख कार्यकारी अधिकृत (डीसीईओ) को रूपमा कार्यरत थिए। उनले आफ्नो लामो सेवाकालका दौरान बैंकका दशभन्दा बढी विभाग तथा शाखाहरूको नेतृत्व गरिसकेका छन्।
